«Радиациялық қауіпсіздік және экология институты» филиалының қызметкерлері «Ломоносов – 2019» XV Халықаралық ғылыми конференциясына қатысты

2019 жылғы 16 және 17 сәуірде ҚР ҰЯО РМК «Радиациялық қауіпсіздік және экология институты» филиалының қызметкерлері А.О. Кенесарина, Ю.А. Шакенова, А.Е. Жиенбекова Нұр-Сұлтан қаласында «Ломоносов – 2019» студенттер, магистранттар және жас ғалымдардың XV Халықаралық ғылыми конференциясына қатысты, бұл конференция Мәскеу университеті өткізетін «Ломоносов-2019» Халықаралық жастар ғылыми форумының құрамдас бөлігі болып табылады және Қазақстан Республикасының Тұңғыш Президенті Н.Ә. Назарбаевтың М.В. Ломоносов атындағы Мәскеу мемлекеттік университетінде тарихи сөз сөйлеуінің 25-жылдығына арналды.

Конференцияның мақсаты студенттердің, магистранттардың және жас ғалымдардың шығармашылық белсенділіктерін дамыту, оларды қазіргі заманғы ғылымның өзекті мәселелерін шешуге жұмылдыру, сонымен қатар, Қазақстан және Ресейдің жаңа бастаған зерттеушілерінің білім алу және ғылыми байланыстарын дамытуға көмек көрсету болып табылады.

Конференция жұмысының негізгі бағыттары еуразиялық ынтымақтастықтың ғылыми ойлары мен тәжірибелерінің заманауи жетістіктері тұрғысынан еуразиялық идеяларды дамытуды ұғындыруға бағытталды.

Қызметкерлер конференцияның «Аймақтық экологиялық мәселелер: заманауи әдістер мен тәсілдер» секциясына қатысты, оған Қазақстанның 13 қаласы мен аймағынан 57 қатысушы қатысқан болатын. Конференция нәтижелері бойынша А.О. Кенесарина жүлделі орынға ие болып, ІІІ дәрежелі дипломмен және медальмен марапатталды.