«AdriBioPro-2022» халықаралық конференциясы

2022 жылғы 13-15 маусым аралығында Черногория, Котор қаласында «Адриатиканың биоалуантүрлілігін қорғау – AdriBioPro-2022» Халықаралық конференциясы өтті, оның шеңберінде АТЭХАГ TC RER7015 – «Ядролық аналитикалық әдістерді пайдалана отырып, Жерорта, Қара, Каспий және Арал теңіздерінің жағалау аймақтарын басқаруды жақсарту» жобасы бойынша кездесу өтті. Конференция Адриатика теңізінің биоалуантүрлілігін қорғау, жағалау мен теңіз аймақтарын сақтау және теңіз ресурстарын тұрақты пайдалану саласындағы заманауи зерттеулерге арналды. Негізгі назар Адриатика теңізінің ғана емес, сонымен бірге Еуразия құрлығының басқа теңіздерінің де теңіз және тұщы су биоалуантүрлілігінің құндылығын арттыруға аударылды. АТЭХАГ конференциясы мен кездесуіне АТЭХАГ осы жобасында Қазақстан Республикасының өкілі болып табылатын қоршаған ортаны мониторингілеу жүйелерін әзірлеу бөлімінің бастығы А.К. Айдарханова қатысты. А.К. Айдарханованың «Теңіз және тұщы судың ластануы» бағыты бойынша Арал теңізінің экологиялық апатына және оның жағалау аймағының ағымдағы экологиялық ахуалына арналған «Арал теңізі экожүйесінің радиоэкологиялық жай-күйін бағалау» тақырыбына стендтік баяндамасы ұсынылды.