Швейцарияда (Шварценбург қ.) ALMERA аналитикалық зертханалар желісі өкілдерінің үйлестіру кездесуі өтті

2019 жылғы 16-18 қазан аралығында Швейцарияда (Шварценбург қ.) ALMERA аналитикалық зертханалар желісі өкілдерінің үйлестіру кездесуі өтті. Іс-шара АТЭХАГ қолдауымен Тұрғындарды ядролық, биологиялық және химиялық қатерлер мен қауіптіліктерден қорғау институтының (Spiez Laboratory) базасында жүргізілді. Кездесу барысында зертханалардың жыл сайынғы кәсіби тестілерінің нәтижелері қарастырылды. Қысқа мерзімді гамма-сәуле шығарушы радионуклидтердің белсенділіктерін анықтау және қоршаған ортаның түрлі үлгілерінің жиынтық альфа-бета белсенділіктерін анықтау сияқты спектрометриялық өлшеулер жүргізген кезде туындайтын сұрақтар талқыланды. Нәтижесінде кеңес қатысушылары алдымыздағы жылға арналған жұмыстар жоспары мен қажетті іс-шаралардың тізімін анықтады. Аталған іс-шара әлемнің 49 елінен 80-нен астам ғалымдар мен мамандарды жинады. ҚР ҰЯО РМК «Радиациялық қауіпсіздік және экология институты» филиалынан кездесуге Ядролық – физикалық талдаулар әдістері зертханасының инженері Ф.Ф. Жамалдинов қатысты.