АТЭХАГ «Қоршаған ортаны қалпына келтіру жөніндегі жобаларды жоспарлау, енгізу және басқару» курстары

2018 жылғы 16-27 сәуір аралығында ҚР ҰЯО РМК РҚЭИ филиалының қызметкерлері Паницкий Андрей мен Каширский Владимир Ресейдің Обнинск қаласындағы Росатом Техникалық академиясында өткен АТЭХАГ «Қоршаған ортаны қалпына келтіру жөніндегі жобаларды жоспарлау, енгізу және басқару» 4-аймақтық курсына (Regional Training Course 4 on the Project Planning, Implementation and Management of Environmental Remediation Projects) қатысты. Оқыту барысында біздің мамандар ремедиациялау жобаларын жоспарлау және басқару бойынша курсты игерді. Аталған курс практикалық жұмыстарға толы болып, ол жұмыстардың барысында ремедиациялық жұмыстарды жүргізу талап етілетін алаңдардың концептуальді моделдері әзірленген, радионуклидті ластану аумағын ремедиациялау тақырыбында Қазақстаннан, Өзбекстаннан, Тәжікстаннан, Қырғызстаннан және Ресейден келген әріптестермен пікірталастар жүргізіліп, уран өндіруші саланың нақты нысандарын ремедиациялау жобаларын басқару жоспарлары әзірленген. Аймақтық курс барысында алынған ақпарат ССП аумағының жекелеген телімдерін рекультивациялау бойынша жоспарланатын жұмыстар тұрғысында және Қазақстан Республикасының қалдық қоймаларын ремедиациялау жобаларын сараптық бағалау үшін пайдалы. Оқыту қорытындылары бойынша А. Паницкийге және В. Каширскийге АТЭХАГ сертификаттары берілген.